4 ka polis gireklamo sa negosyante

CEBU, Philippines - Gihangyo sa usa ka negosyante ang buhatan sa Office of the Ombudsman-Visayas sa pag-imbestigar sa upat ka polis nga nadestino sa lungsod sa Alcoy Police Station tungod sa giingong ilegal nga pagbilanggo kaniya nga walay klarong kaso.

Ang negosyanteng si Jose Earl Plando sa Barangay Daanlungsod molupyo sa maong lungsod nga mamalitay og kanding mipasaka og reklamo batok nilang PO1 Leon Gesim, PO2 Raniel Cartin, PO1 Gerlito Estremos ug PO1 Abraham Quijano.

Matud pa ni Plando nga nahinabi sa igsuong pamantalaan sa Banat News nga The Freeman, gisikop siya ug gibilanggo sa nahisgutang mga polis nga walay igong hinungdan.

Giingong gipasanginlan siyang may kalambigitan sa mga nahitabong pagpangawat og kanding sa iyang mga silingan ug gidakop ug gibilanggo siya tungod lang niini bisan walay klarong imbestigasyon.

Si Plando mibutyag nga niadtong Oktubre 6 naabot siya sa ilang panimalay alas-7 sa gabii ug gitunolan siya sa iyang amahan nga si Priscilo og invitation letter gikan sa kapolisan sa maong lungsod.

“That after reading the letter, I was really bothered and surprised when my father told me that the PNP members of Alcoy wanted me to appear at the Police Station in the morning for a conference regarding the complaint of Luz Jackson who complaint against me that I was the one who stole their four goats,” matud pa ni Plando.

Midugang si Plando miadto siya sa panimalay sa iyang iyaan aron mangutana ug asa ang panimalay sa mga Jackson apan ang iyang iyaan mibutyag nga ugma nalang siya tudlo-an niini tungod kay layo kini.

Samtang nakig-estorya siya sa iyang iyaan miabot ang patrol car sa polis ug dihang mihunong iyang gipangutana ang tulo ka polis nga silang Cartin, Estremos ug Gesim nganong gipadad-an siya og invitation letter.

Sumala pa niya nga dihang didto na siya sa presinto daw gi-interogate siya sa mga polis ug gipangutana asa siya niadtong gabii sa Oktubre 5 ug gibati siya nga giduot siya sa maong krimen nga wala niya buhata.

Matud pa niya naabtan nalang siya og gabii sa maong presinto ug giingnan nga anha nalang siya pakatulgon sa prisohan hinungdan nga nianang pagkasunod adlaw napugos siya pagbayad og P12 mil isip settlement sa kanding nga nawala.

Apan ang maong kasinatian nakapakauwaw kaniya ug sa iyang pamilya nga miresulta sa ilang kaguol.

“Because of the incident, I suffered sleepless nights because my reputation and also my family’s reputation is being damage due to unlawful arrest and illegal detention done by the abusive minds of police officers in Alcoy Police Station,” tipik sa reklamo ni Plando.  - BANAT NEWS