Pamilya Gimasaker

CEBU, Philippines - Mga anak, asawa ug katabang gihurot og pamatay sa usa ka amahan kinsa nagpusil usab sa iyang kaugalingon kagahapon sa buntag diha sa ilang balay diha sa Palm View Subdivision, sitio Sangi, barangay Tabunok, dakbayan sa Talisay.

Ang mga biktima mao ang 53-anyos nga giingong branch manager sa usa ka bangko (asawa), mga anak nilang 26-anyos nga nurse ug kanhi volunteer sa Emergency Rescue Unit Foundation (ERUF) ug nagtrabaho na isip call center agent; 25-anyos nga radiation technologist; 18-anyos nga nursing student ug ang 30-anyos nga katabang.

Ang suspetsado mao ang 55-anyos nga retiradong seaman ug padre de pamilya sa maong banay kinsa naghikog usab human pamusila ang mga biktima.

Sa imbestigasyon sa kapolisan, ang 14-anyos nga kamanghurang anak sa magtiayon gituyo sa suspek nga wala pusila ug gipadagan kini ug gisugong patawgon og polis.

Si Inspector Ricardo Echavez nga nahinabi sa mga tigbalita kagahapon nagkanayon nakadungog ang 14-anyos ug butobuto sa armas maong migawas kini sa iyang lawak.

Mao nalay kakugang niyang nakita niini ang maguwang nga nurse nga nagluhod ug nagkadugo atubangan sa ilang amahan.

Matud ni Echavez ang suspek misugo dayon sa bata nga “gawas didto kay ikaw ray mabuhi karon kay magpakamatay ko, tawag og polis!”  Sa paggawas sa bata sa ilang balay nakita niya ang ilang katabang nagbuy-od na diha sa kusina ug ang usa ka babaye diha ilawom sa dining table nagbuy-od nga mao diay ang iyang inahan.

Dihang diha na siya sa gawas nakadungog ang bata og usa ka buto ug niadtong higayona naabot usab ang mga polis. Matud ni Echavez nga si Talisay City Administrator Richel Bacaltos ang mitawag kang SPO1 Mikie Espina sa Talisay City Police Station Homicide mga alas 8:24 sa buntag kagahapon nagpahibawo kabahin sa hitabo.

Si PO1 Jude Enemecio uban kang PO1 Jovie Antipolo ang unang miresponde ngadto sa lugar diin ang maong mga polis nakadungog pa og usa ka buto.

Sila si Enemecio ug Antipolo nagtuong dunay nagpinusilay sa sulod sa balay sa mga Ponce ug nanawag sila og backup kinsa sila si SPO1 Archimedes Judilla, PO3 Benedicto Lasque ug PO3 Rey Bucao sunod si SPO1 Mikie Espina ang miadto usab sa lugar nga nahitaboan.

Ang gate sa balay abli na hinungdan nga nakasulod ang mga polis ug giguba ang pultahan sa kusina aron makasulod gyud ngadto sa balay. Matud ni Echavez nga pagsulod sa mga polis naabtan nila ang padre de pamilya (suspek) diha sa kusina naglingkod nga nagdungoy ug naggunit pa sa kalibre .45 nga pistola.

Ang katabang diha sa kusina nagbuy-od ug ang asawa suspek diha sa ilawom sa dining table nagbuy-od. Samtang ang usa sa mga anak nga babaye diha pa sa ibabaw sa double deck sa kwarto nga nagtinga na.

Ang patay’ng lawas sa 18-anyos tinun-an sa nursing nagbuy-od usab duol sa banyo nga gituohang migawas samtang naligo tungod sa pagkadungog sa butobuto.

Ang lima pulos adunay samad pinusilan sa ulo gawas sa katabang nga nakaangkon og samad pinusilan sa walang bahin sa iyang dughan.

Ang kapolisan nanawag sa Talisay Rescue Action Team (TREAT) diin ang tanang mga samaron gidala ngadto sa Talisay City District Hospital apan pulos sila wala nay kinabuhi pag-abot sa maong tambalanan.

Matud usab ni Echavez nga ang mga silingan sa pamilya nakadungog og buto-buto.

Ang asawa sa suspek nga usa ka branch manager sa Banco De Oro (BDO) sa Tabo-an Branch, dakbayan sa Sugbo giingong gikan pa kini miapil sa sports fest nga gipasiugdahan sa BDO ug gani nagsul-ob pa kini og sports shorts ug sleeveless nga t-shirt para dagan.

Giingong aktibo ang maong ginang pag-apil sa mga marathon dinhi sa Metro Cebu ug naglaraw unta nga makaapil sa lumba didto sa Manila human kini modaog sa ikaunom nga pwesto niadtong Septiyembre 10, 2011 sa Womens Category sa Warrior 53k Ultramarathon nga gipahigayon sa usa ka beach resort sa dakbayan sa Lapulapu. Ang maong distansiya gihuman niya og 5:39:25. - Dugang report ni Manny Villaruel, The Freeman Sports Editor/EIM (BANAT NEWS)