2 nadunggaban sa silingan

CEBU, Philippines - Samaran ang duha ka ulitawo human kini dunggaba sa ilang silingan sa miaging gabii sa managlahi nga lugar sa Sugbo.

Pasado alas-9 sa miaging gabii, maayong pagkabuslot sa dughan sa usa ka Godi Sagdili, 28, human dunggaba sa silingan niining si Jemuel Ratso diha sa barangay Valladolid siyudad sa Carcar.

Sa pakighinabi sa Banat News ni SPO1 Joel Pananganan, Carcar Police, mibutyag nga ang biktima ug ang suspetsado nagkalalis ug kalit lang gidunggab sa suspetsado ang biktima ginamit ang icepick.

Human sa maong panghitabo daling mikaratil og dagan ang suspetsado palayo sa maong lugar samtang ang biktima gidali usab og dala sa Carcar District Hospital apan gibalhin kini sa usa sa mga tambalanan sa Sugbo.

Sa dakbayan sa Sugbu nadunggaban usab ang usa ka William Sab-a, 28, nga taga sitio San Roque barangay Luz sa silingang si Jemer Glore.

Nasayran nga ang biktima nagkalingaw og inom sulod sa ilang panimalay uban sa pipila ka mga higala dihang kalit misulod ang suspek ug mikomprontase kaniya.

Taliwala sa ilang panaglalis nagkarambola ang duruha ug kalit lang gitusak-tusak sa suspetsado ang biktima og kutsilyo sa tuong bukton, tuong batiis ug tuong liog.

Nalandig ang biktima sa Cebu City Medical Center samtang ang kapolisan padayun pang nagpangita sa misibat nga suspetsado. (BANATNEWS)