Mayor Mariñas mibiya sa One Cebu Party

CEBU, Philippines - “We declare war against political dynasty, sugod karung adlawa mobiya nako sa One Cebu Party,” mao kini ang gipahibawo ni Barili Mayor Teresito “Ondo” Mariñas kagahapon ngadto sa dul-an 500 ka mga tawo nga mitambong atol sa iyang ika-48 nga kasumaran sa adlaw’ng natawhan nga gipahigayon diha sa Sta. Ana Academy sa barangay Poblacion.

Ang mga pinasidunggang dinapit mao sila si kanhi senador Sonny Osmeña, kanhi kongresista sa 3rd district sa probinsya sa Sugbu Dr. Antonio Yapha, iyang kapikas nga si kanhi board member Dra. Estrella Yapha, kanhi Barili mayor Chuck Bong Nemenio.

Wala makatambong ang pinasidunggang dinapit mao si Atty. Hilario ‘Junjun Davide, provincial head sa Liberal Party gumikan sa ubang kalihukan.

Si Mariñas mitataw nga magpasakop na siya sa Liberal Party diin sila si Osmeña ug Yapha maoy iyang kauban sa partido, ang partido ni Presidente Benigno Simeon Aquino III.

Gibutyag sa mayor nga atol sa iyang State of Municipal Address (SOMA) niadtong Biyernes iyang gisaysay didto ang iyang nahimo sukad siya milingkod niadtong 2007.

Apan atol sa iyang SOMA niadtong Biyernes walay bisan usa ka konsehal sa lungsod ang mitambong. Ang bise mayor ni Mariñas nga si Marlon Garcia maoy posibleng makaatbang ni Mariñas sa umaabot 2013 nga eleksyon.

Kagahapon gipadayag sa mayor ang iyang kasagmuyo nga gilaslasan og maayo ang iyang budget maong apektado ang iyang pagserbisyo sa iyang mga konstituwente samtang ang travel allowance sa mga konsehal nga atua na sa kampo ni Garcia maoy giingong gipaburot og maayo.

Gipagawas usab ang kasagmuyo sa mayor ngadto kang Kongresista Pablo John Garcia tungod kay upat na ka tuig ang milabay gikan paglingkod niini wala gyud mahatag ang proyektong iyang gipangayo.

Kini sama sa road concreting sa barangay Giloctog ngadto sa Paril, Dakit ngadto sa Luhod, water project sa barangay Luyo, budget alang sa riprap sa market building ug ang pagpalambo sa live stock market diha sa barangay Mantalongon diin dunay tabo matag adlaw’ng Huwebes.

Matud sa mayor nga pulos lang saad ang kongresista ug daw hangin ang tanang pasalig.

Sumala pa niya kung magpabilin siya sa partido sa One Cebu Party ni Gob. Gwendolyn Garcia wala siyay mahatag nga maayong serbisyo sa katawhan sanglit gikontrahan man siya sa igsuon sa gobernador nga iyang bise mayor.

Nagtuo ang mayor nga ang pagbalhin niya sa kampo ni Osmeña ug Yapha makahatag siya og maayong serbisyo sa katawhan kay nagtuo siyang dili siya pasagdan sa mga gikinahanglan sa lungsod.

“If there is a price to pay for this decision, ako ipaniguro nga mibiya ko pero, dunay grupo nga andam moagak kanako. Enough is enough of this political situation,” matud pa ni Mariñas. (EIM) (BANATNEWS)