Mga namuyo sa sapa sa Mandaue pahawaon

CEBU, Philippines - Gitinguha karon sa kagamhanan sa dakbayan sa Mandaue nga hawanan gikan sa mga ‘informal settler’ ang mga lugar nga kuyaw sa baha ilabi na diha sa daplin sa Mahiga Creek sa barangay Subangdaku, Butuanon River sa barangay Maguikay ug sitio Orel sa barangay Banilad sa dakbayan.

Si Francisco Amit nga sakop sa Mandaue City Board on Socialized Housing (MCBOSH) ug sakop usab sa Solid Waste Management Program sa dakbayan miingon nga tinguha nilang malimpiyohan ang daplin sa mga sapa.

Ang dakbayan aduna nay giandam nga 5.6 ektaryang luna sa barangay Paknaan nga kabalhinan sa maapektahang pamilya.

Dugang pa niya nga sa higayon nga mahawanan sa mga ilegal nga estraktura ang mga sapa hingpit na nilang mamentinar ang kalimpyo sa maong mga sapa.

Si Bise Mayor Glenn Bercede nga maoy acting mayor karon sa dakbayan sa Mandaue nga nahinabi sa Banat News miingon nga hapit na kahatagi og katumanan ang plano nga pagpahiluna sa mokabat 1, 200 ka mga informal settlers sa maong lugar ngadto sa relocation site sa barangay Paknaan.

Matud pa ni Bercede nga ang matag beneficiary sa maong luna makabaton og 28 metros kwadrado nga luna nga maoy katukoran nila og balay. Ang maong luna gisugdan na og abuno og yuta aron dili lunopan ug gi-develop pa ang mga gikinahanglang proyekto aron kini desenteng mapuy-an sa mga mamuyo. (BANATNEWS)