CEBU, Philippines - Miabot sobra sa dos mil ka mga pamilya ang naapektahan sa paglunop sa baha atol sa grabeng pagbunok sa kusog nga uwan atol sa pag-igo sa bagyong Ramon nga nakaapektar sa dili muminos 14 ka mga barangay sa lungsod sa Madridejos isla sa Bantayan.
Subay sa rekord sa Municipal Social Welfare Office sa Madredijos 2,206 ang tanang pamilyang naapektahan sa baha gikan sa barangay Bunakan 250 ka pamilya, Calanghan 80, Mansilang 262, Poblacion 250, Tugas 286, Pili 150, barangay Maalat 250, Tabagak 100, Kudya 65, Tarong 40, Malbago 218, Cangwayan 60, Tungkod 50 ug 45 sa barangay San Agustin.
Sa gihimong pakisusi sa mga social worker nasuta nga dunay mga panimalay nga nalubong gyud sa lapok ug ang ubang mga panimalay ilabi na kadtong nahimutang daplin sa baybayon nalumpag dihang gihapak sa bawod sa dagat.
Si Mayor Salvador Sally dela Fuente uban ang mga municipal social worker inabagan ni Konsehal Emie Matis maoy nang apod-apod sa mga relief goods sa mga apektadong pamilya. (BANATNEWS)