Street Dancing competition sa Inasal Festival karon

CEBU, Philippines - Magsaulog sa kapistahan ang dakbayan sa Talisay sa ilang patrona nga si Santa Teresa de Avila karong adlawa (Sabado) nga buksan sa usa ka Consolidated Mass nga saulogon sa Arsobispo sa Sugbo Jose Palma diha sa Santa Teresa de Avila Parish sa barangay Poblacion sa alas 9:30 sa buntag.

Si Arturo Bas, public information officer sa Talisay sa pakighinabi sa Banat News kagahapon nagkanayon nga human niini mosunod dayon ang parada sa Inasal Festival.

Ang parada ipahigayon sa ala-una sa hapon nga manukad atubangan sa city hall habig sa Cebu South Coastal Road sa barangay Lawaan ug moagi kini diha sa junction sa barangay San Isidro paingon ngadto sa Dumlog lahos na sa Talisay City Central School sa barangay Poblacion diin ipahigayon ang dance show down sa mga contingent.

Si City Administrator Richel Bacaltos mibutyag nga siyam ka mga dancing contingents nga gilangkuban sa walo ka mga pampubliko ug pribadong tunghaan ug local government unit (LGU) ang mosalmot ug mopahigayon og street dancing. Si Bacaltos mibutyag nga niining tuiga ang unang higayon nga himuong contest ang dance presentation. Ang matag eskwelahan nga misalmot gihatagan sa siyudad og P50 mil nga budget alang sa ilang costumes ug props.

Ang walo ka mga tunghaan mao ang Maghaway Elementary School, Candulawan Elementary School, Divino Amori Academy, Saint Scholastica Academy, San Roque Elementary School, Lawaan National High School, Cansojong National High School ug Sister’s of Mary.

Ang mga pinasidunggang dinapit sa maong kalihukan mao sila si Kongresista Eduardo Gullas sa unang distrito sa lalawigan sa Sugbo, Gobernador Gwendolyn Garcia ug Mayor Socrates Fernandez. (EIM)  (BANATNEWS)