Dolphin giihaw sa mga mananagat

CEBU, Philippines - Nag-iyahay og panagan ang mga mananagat kinsa giingong milapa ug mibahin-bahin sa usa ka baby dolphin (lumod) dihang nangabot ang opisyal sa barangay ug sea guard kagahapon sa buntag diha sa barangay Inuburan, dakbayan sa Naga.

Si Kagawad Martin Panilag sa pakighinabi niini sa mga tigbalita kagahapon mibutyag nga tanod sa ilang barangay ang nagpahibawo kabahin sa dolphin nga gilapa sa mga mananagat.

Ang sea guard nga si Moises Catuday kinsa miresponde usab sa maong insidente nakaembargo og karne sa dolphin apan dapit nalang sa ikog ug gilubong niya kini.

Matud pa ni Panilag patay na ang dolphin dihang nakit-an sa usa ka mananagat nga giila lang sa ngalan nga “Jong-Jong” gikan diha sa kadagatan sa Tuyan, Naga.

Ang maong dolphin nakuha ilawom sa duha ka dupa lang nga giladmon dunay bun-og sa ulo ug gituohan nga posibleng tungod sa kakusog sa bawod tungod sa bagyong Ramon naanod ang maong isda ug nalamba sa mabaw nga bahin o ba kaha naigo sa palabad sa barko.

Si Cecil Canonigo sa City Agriculture nagkanayon nga ang dolphin usa sa endangered species sa kadagatan hinungdan nga gidili ang pagkuha sa maong matang sa isda.

Si SPO1 Rodolfo Baga kinsa maoy mipahigayon sa imbestigasyon nagkanayon nga sa report nga iyang nadawat 20 ka kilo ang gibug-aton sa maong isda apan wala na usab siya’y naabtan ngadto sa lugar. (BANATNEWS)