Balay natabunan sa landslide

CEBU, Philippines - Usa ka balay ang natabunan sa nahitabong pagdahili sa yuta tungod sa bunok sa uwan kagahapon sa alas 12:30 sa kaadlawon diha sitio Lower Caduldulan, barangay Lawaan III, dakbayan sa Talisay. Si Delia Ybañez, kapitan sa nahisgutang barangay mibutyag nga ang maong balay gipanag-iya sa pamilyang Maghinay. Garas ra hinuon maoy naangkong kadaot sa amahan sa pamilya.

Sumala pa dihang midahili na ang yuta daling milusot diha sa bintana sa ilang balay ang inahan ug anak ug naulahi ang amahan hinungdan nga naabtan kini sa pagkahugno sa balay ug nakaangkon og gamay’ng garas sa bukton.

Gawas sa pamilyang Maghinay laing pito ka mga pamilya ang iyang gipahikling una tungod kay peligro ang nahimutangan sa ilang mga balay.

Ang maong walo ka mga pamilya naa temporaryong mitipon sa ilang mga paryente sa sikbit nga lugar.

Ang kapolisan, city social welfare ug rescue team sa siyudad ang daling miresponde sa dapit. Si Ybañez midugang nga mihumok ang yuta diha sa maong sitio tungod sa sige og uwan. (BANATNEWS)