BJMP sa Naga may budget

CEBU, Philippines - Gihimakak sa jail warden sa Naga City Jail nga si Senior Inspector Genesis Mongcopa ang report nga ang mga paryente ni Bella Ruby Santos mipakaon kanila aron hatagan og special treatment ang suspetsado sa pagdagit ug pagpatay sa 6-anyos nga batang si Ellah Joy Pique.

Si Mongcopa sa pakighinabi niini sa mga tigbalita kagahapon nagkanayon nga walay basehan ang maong report ug gani dili siya mohatag og pagtugot sa iyang mga sakop nga mokaon sa pagkaon nga ihatag sa mga paryente ni Santos .

Gitataw ni Mongcopa nga sila sa city jail duna silay kaugalingong budget sa pagkaon.

“Sila duna sila’y special needs (mga inmates), pero wala silay special treatment…pareho nato duna silay special needs pero in terms of VIP treatment wala sila,” pagklaro ni Mongcopa.

Ang gipasabot niya nga special needs mao ang kabahin sa psychological needs sa pakig-uban sa inmate ngadto sa iyang mga kauban. Matud niya nga si Santos misunod usab kini sa mga gipatuman nga lagda diha sa prisohan lakip na iyang mga dalaw.

Ang selda nga nahimutangan ni Santos duha lang ang kapasidad niini apan upat sila karon nga nag-ukopar. (BANATNEWS)