CEBU, Philippines - Drayber sa septic tank ug duha ka truck boy niini ang gidakop human maaktuhing naglabay og hugaw sa tawo diha sa manhole sa Cebu International Convention Center (CICC) sa dakbayan sa Mandaue.
Ang drayber nga nadakpan mao si Joel Maglignat ug duha ka truck boys niini nga sila si Jack Maligmat ug Joramel Labastida pulos taga dakbayan sa Sugbo.
Si PO1 David Omambac sa kapolisan sa Presinto 1 sa Centro Police Station sa Mandaue City Police Office (MCPO) miingon nga ang tulo nadakpan sa mga sakop sa Mandaue City Environment Enforcement Unit (MCEEC) nga gipangulohan ni Placido Jerusalem.
Matud pa ni Jerusalem nga ang tulo nakalapas sa Section 48 sa Republic Act 9003 kon Solid Waste Management Act of 2000 nga nagdili sa pagdala ug paglabay og mga hugaw.
Dugang pa ni Jerusalem nga nakalapas usab ang tulo ka dinakpan sa maong balaod nga gipatuman sa paglabay ug pagdala sa basura nga walay permit nga giluwatan gikan sa lokal nga kagamhanan sa maong dakbayan.
Si Jerusalem midugang nga ilaha na usab nadakpan kaniadto ang maong grupo diha sa United Nation Avenue sa mao gihapong dakbayan. (BANATNEWS)