Mga stalls sa pirated DVDs naugdaw

CEBU, Philippines -  Mokabat og P75,000 ang danyos sa nahitabong sunog kagahapon sa kaadlawon nga miugdaw sa tulo ka mga stalls kilid sa Cebu South Bus Terminal (CSBT) diha sa dalan Natalio Bacalso Avenue sa siyudad sa Sugbu.

Si FO2 Ulysses Hermoso sa Bureau of Fire Protection (BFP) sa pakighinabi sa Banat News mibutyag nga nadawat nila ang alarma alas 4:48 hinungdan nga daling miresponde ang ilang mga firetrucks.

Ilang nakontrolar ang maong sunog sulod lamang sa unom ka minutos nga gipaubos sa second alarm.

Sa pasiunang imbestigasyon nasuta ang naugdaw nga tulo ka mga stalls gipanag-iya nila ni Akmar Cidat, Emma Pacalna ug Elen Atindas nga ang mga gipamaligya niini pulos mga DVD’s.

Matud ni Hermoso nagpadayon pa ang ilang gihimong pakisusi kun unsay hinungdan nganong nasunog ang maong mga stalls.

Wala hinuoy gikataho nga dunay naangol atol sa maong sunog. (BANATNEWS)