CEBU, Philippines - Ipahigayon ugma Biyernes ang ikalima nga State of the Municipality Address (SOMA) ni Barili Mayor Teresito Mariñas didto sa legislative building sa maong lungsod nga tambungan sa mga konsehal , mga kapitan sa kabarangayan ug mga molupyo sa lungsod.
Una si Mayor Mariñas mobarog sa entablado alang sa maong SOMA sa alas 10:30 sa buntag unahon pagpahigayon ang santos nga misa sa alas 9:00 sa maong kabuntagon.
Sentro sa hisgutan sa gibana-banang molanat og usa ka oras nga SOMA sa mayor mao ang mga napatumang proyekto ubos sa iyang pagdumala sa lungsod.
Kini naglakip sa napatukod nga mga inprastraktura, pag-atiman sa edukasyon, agrikultura, pagprotiher sa kinaiyahan, turismo ug paglawas. Human sa SOMA ilusad dayon sa mayor ang compost making contest o indigay sa pagpadaghanay sa matigom nga abuno gikan sa basurang malata
Gipangandam og dagkong ganti ang mga mananaog sa maong mga bangga nga pasalmotan sa publiko, mga eskuylahang pribado ug sa gobyerno, mga negosyante, mag-uuma, mananagat ug mga drayber sa sikad-sikad. Sa maong adlaw ilusad usab sa kagamhanan sa lungsod ang labing una nga popular music song and writing contest sa mga awit nga Binisaya.
Ang kagamhanan sa Barili migahin na og pundo alang sa ganti sa mga mananaog sa compost making contest ug popular music song and writing contest sa kantidad nga P7 mil, P5 mil, ug P3 mil alang sa una, ikaduha ug ikatulong mananaog sa bangga sa abuno ug kanta. - BANAT NEWS