Lapulapu nangandam sa bagyo

CEBU, Philippines - Bisan pa kun gilibkas na ang signal sa bagyong Ramon dinhi sa Sugbo nangandam gihapon   ang lokal nga kagamhanan sa Lapulapu sa posibleng pagbalik sa maong bagyo.

Matud pa ni Lapulapu City Mayor Paz Radaza nga iyang gipaandam ang mga sakop sa City Engineerings Office ug Clean and Green sa pagmonitor ug paglimpiyo sa mga kanal sa mga dapit nga daling mosaka ang tubig ug daling mabahaan.

Usa sa dapit   sa dakbayan nga   dali kaayong lunopan mao ang Sitio Iba, Brgy. Basak gumikan sa kakuwang og drainage system sa maong dapit.

Ang mga barangay sa Isla sa Olango ug mga coastal barangay pinaagi sa ilang mga barangay kapitan gimandoan usab ni Mayor Radaza sa pagpugong sa mga pumpboat nga pasaheroan ug panagatan nga dili palawigon   samtang anaa pa ang bagyo aron kalikayan ang pagkausik sa kinabuhi.

Ang mga sakop sa City Disaster Risk Reduction Management Council (CDRRMC) uban sa ilang mga rescue group ug mga ekipo alang sa daling pagresponde kung adunay angayang i-rescue giandam na pag-ayo.

Base sa ilang pagmonitor, may usa ka balay sa Brgy. Pangan-an, Isla sa Olango, nadat-ugan sa punoan sa lubi apan walay gikataho nga naangol o namatay sa maong insidente.

Gawas   niini wala usab silay namonitor nga mga kabtangan nga nagusbat atol sa pagsud sa bagyong Ramon.

Giangkon ni Mayor Radaza nga dili pa hingpit nga nahuman ang ilang proyekto sa drainage system sa palibot sa dakbayan sa Lapulapu gumikan sa kakulangan sa pundo apan ila kining paningkamutan nga mahuman gyud sa daling panahon.

Gumikan niini iyang gihangyo ang mga residente nga manglimpiyo sa ilang mga dapit ilabi na niadtong adunay mga kanal nga barado sa basura.

Samtang sa dakbayan sa Sugbo wala usab apektohe sa bagyong Ramon ang bisan haing lugar sa dakbayan.

Kini tungod kay matud   pa ni Executive Director Alvin Santillan sa CDRRMC nga alerto kaayo ang iyang mga sakop sa pagbantay sa epekto sa bagyo.

Hinuon matud pa niya nga may mga pagpanahili sa yuta nga nahitabo didto sa barangay Buhisan, Bonbon, Busay ug Kalunasan.

Hinuon walay gikataho nga kinabuhing naangin sa maong mga panahili sa yuta.

Apan sa natumbang kahoy didto sa Kalunasan may usa ka tawo ang naangol dihang nawiktan kini sa sanga sa acasia nga natumba.

Sayo niini si Mayor Michael Rama daan nang mipasidaan sa tanang sakop sa CDRRMC nga magmabinantayon tungod kay ang panahon nga nagkinahanglan sa ilang kaabtik ug lihok sama sa bagyo taliabot na sa Sugbo.  - BANAT NEWS