Mipatay sa bata gipaslak sa Mandaue jail

CEBU, Philippines - Tua gyud ipaslak   sa Mandaue City jail ang suspetsadong mipatay sa 7 anyos nga batang lalaki apan ang kauban niini gibuhian kagahapon tungod sa kamandoan sa korte.

Si PO2 Marvin Fegarido sa Investigation Detection and Management Bureau (IDMB) nga nahinabi sa Banat News miingon nga ang suspetsado nga si Mario Abecia, 42, nga taga Riverside sa barangay Subangdaku sa maong dakbayan nahatod na sa Mandaue City Jail.

Kini luyo sa pagdumili ni Abecia tungod kay nabalaka siya nga madisgrasya siya kun adto siya mapriso sa city jail.

Samtang si Arcenio Ursal Jr., 24, kinsa natanggong usab sa prisohan sa Subangdaku uban ni Abecia   giluwatan og release order sa korte hinungdan nga nakagawas kini.

Daan nang gipadayag ni Abecia nga kuyaw ang iyang kinabuhi kun anha siya ipaslak sa prisohan sa dakbayan sa Mandaue tungod kay anaa mabilanggo diha ang amahan sa bata nga iyang gipatay.

Busa   dili gayud usab sila motugot nga magtipon sa usa lamang ka selda si Abecia ug ang amahan sa 7 anyos nga bata. Sa nasayran nga si Abecia nag-atubang og kaso nga serious kidnapping with murder tungod sa pagdagit ug pagbaat sa packaging tape sa nawong ug lawas ni Gabriel Morales nga maoy nakaingon sa kamatayon niini.

Ang inahan sa biktima nga si Christine, 29, nga kapuyo sa suspetsado nakigbulag na niini nga maoy hinungdan sa iyang pagpatay sa bata.  - BANAT NEWS