Way epekto sa presyo sa karne ang bagyo

CEBU, Philippines - Gipaabot nga adunay gamay nga epekto sa presyo sa mga pagkaon alang sa mga namuhi og hayopan sa Kabisay-an ang kanunay’ng pagkaigo sa sektor sa agrikultura panahon nga adunay bagyo ug makaapekto usab sa presyo sa karne.

Apan ang kapunongan sa mga supplier sa lokal nga mga karne dinhi sa Kabisay-an mipasalig nga dili momahal ang presyo sa karne diha sa merkado gumikan lang niini.

Bisan ang Luzon maoy gikastigo og maayo sa bagyo nga sa nakalabay’ng duha ka nangaging bagyong Pedring ug Quiel midanyos og gibana-banang P12 bilyones sa habig sa agrikultura sumala pa sa National Disaster Risk Reduction and Management Council makaapekto gihapon kini sa Kabisay-an.

Ang supply sa mga mais nga maoy nag-unang sagol alang sa paghimo og farm feeds nga gibaligya karon dinhi sa Kabisay-an nagagikan sa Mindanao sumala pa ni Roland Tambago ang presidente sa Central Visayas Pork Production Cooperative (CVPPC).

“Eventually mosaka og gamay ang presyo sa feeds,” matud pa ni Tambago tungod sa mamahimong kompetensya sa supply sa mais tungod sa mga umahang naigo sa pagbaha sa Central Luzon.

Nunot niini adunay kabalakang karong magsige og sulod ang bagyo sa nasud mosaka usab ang presyo sa mga karne sa merkado.

“Posible (mosaka ang presyo) jud pero kaming pork producers mag-abaga ana nga increase. Dili namo ipasa sa mga konsumidor,” pagklaro pa ni Tambago sa maong kabalaka.

Hinuon giklaro ni Tambago nga bisan prayoridad sa mga local feed producers ang abot sa mga lokal nga mga mag-uuma sa nasud dako og natampo isip alternatibo ang mga gi-import nga produkto gikan sa nasud sa Russia sama sa wheat nga gamiton usab sa paghimo og harina ug lawog sa hayupan.  - BANAT NEWS