Vendors sa Freedom Park sa Carbon papahawaon

CEBU, Philippines - Hugot na nga papahawaon ang mga vendors sa pipila ka mga bahin sa Freedom Park sa Carbon Public Market sa barangay Ermita karong Oktubre 17 sumala pa sa hepe sa City Market Authority nga si Raquel Arce.

Ang maong dapit maoy butangan isip loading ug unloading area alang sa mga sakyanang gikan sa mga umahan nga maghatud og mga produkto.

Moabot ngadto sa 16 ka mga stalls ang maapektohan sa clearing operation. Ang maong mga vendors matud pa ni Arce igo lang mipirma og undertaking niadtong 2009 ubos sa kasabotan nga mohawa sila kung gamiton na kini sa siyudad.

Dugang pa niya nga walay relokasyon nga ihatag ang siyudad ngadto sa mga maapektohan sa clearing operation.

Giingong dako kaayo kini og ikatabang sa pagsulbad sa problema sa trapiko sa maong dapit.

Nasayran nga sa miaging adlaw’ng Lunes pa ang gihatag nga deadline alang sa mga vendors sa nahisgutang stalls apan ila na lang kini nga gi-extent hangtud sa Domingo aron mahatagan sila og igong panahon sa paghipos sa ilang mga gamit.  - BANAT NEWS