2 patay kang Ramon

CEBU, Philippines - Duha ang namatay samtang duha ka bata ang nangaangol sa duha ka aksidente may kalambigitan sa bagyong Ramon dinhi sa lalawigan sa Sugbu kagahapon sa udto sa milabay’ng gabii sa buwag nga mga lugar.

Namatay human matusok sa mata og kabilya ug duha ka mga bata ang seryusong naangol dihang nahugno ang gabok nga footbridge sa barangay Canbang-og sa siyudad sa Toledo kagahapon sa alas 12:20 sa udto.

Patay diha-diha pagkahugno sa footbridge nga gituohang tungod sa hangin ug uwan dala sa bagyong Ramon giila sa kapolisan nga mao si Wilfredo Canillo Sabroso, 30, nagpuyo sa maong lugar ug ang duha nga naangol mao ang magsuon nga sila si Jonalie Parba, 15 ug Jilmar Parba, 12.

Matud ni SPO1 Roel Tadique, usa sa mga polis sa dakbayan sa Toledo nga miresponde sa alarma mibutyag sa Banat News nangagi sa footbridge ang mga biktima dihang kalit nahugno ug nauban og katagak si Sabroso.

Gihulagway nga natusok ang tuong mata ni Sabroso sa pagtugpa niini sa ubos nga bahin sa sapa gikan sa kabilya sa nahunlak nga footbridge.

Gi-swerte ang duha ka magsuong bata tungod kay wala dayun mahurot og kahunlak ang maong footbridge ug nalabay una kini una pa natagak sa ubos nga bahin.

 Ang mga bata gihatud sa Toledo City District Hospital ug gibalhin og laing tambalanan sa dakbayan sa Sugbo samtang si Sabroso namatay diha-diha human matusok ang tuong mata sa kabilya.

Gihulagway sa kapitan sa barangay nga si Kapitan Epefanio Panugan nga dugay nang wala nila paagii sa mga tawo ang maong footbridge tungod kay nakankan na ang pundasyon sa baha ug wala na magtugkad sa ubos ang pikas tumoy sa taytayan.

Dugang nahipos nga impormasyon nga ang usa sa hinungdan sa pagkankan sa maong footbridge mao ang kanunay nga pagpangubkob og bas ug graba ilawom sa maong sapa.

Sa laing aksidente, patay ang 64-anyos nga si Benvienido Cañete sa sitio Camolinas, barangay Poblacion sa lungsod sa Cordova alas 6:40 Martes sa gabii dihang kini nakuryentihan sa sin nga nasandayan sa natumbang poste sa kuryente.

Matud ni PO2 Dennis Camunay desk officer sa Cordova Police Station si Cañete gikan sa silingan ug padulong na pauli tungod sa paghaguros sa hangin ug pagbunok sa uwan.

Apan pag-agi niini sa dalan paingon sa ilang balay nga gikoral ug sin kalit natumba ang poste sa kuryente diha sa ilang koral ug misanday sa koral ug natungnan nga nagkupot ang biktima sa koral hinungdan nga kini nakuryentihan ug tungod sa kakusog sa boltahe nalamba ug nabunal ang ulo niini sa footstep nga semento ug nakuyapan.

Sa pag-respondi sa mga polis kauban ang municipal health officer sa lungsod Dr. Christopher Calimbas patay na kini. – EIM (BANAT NEWS)