State of calamity ang Mandaue

CEBU, Philippines -  Gideklarar nga naa sa state of calamity ang tibuok dakbayan sa Mandaue aron makapagawas og salapi sa calamity fund sa maong dakbayan alang sa pagtubag sa mga panginahanglan sa kabarangayan nga naigo sa pagbaha tungod sa kusog nga pagbunok sa ulan.

Natigayon ang pagdeklarar ubos sa state of calamity ang tibuok dakbayan sa Mandaue sa special session nga gihimo sa mga sakop sa konseho kagahapon usa ka adlaw sa dili pa mosulod sa Sugbu ang bagyong Ramon nga gipaabot nga moigo karong gabii sa amihanang Sugbu.

Gisagop sa konseho ang resolusyon sa City Disaster and Coordinating Council (CCDC) nga nagdeklarar sa siyudad nga naa sa kalamidad.

Si Mayor Jonas Cortes nga milarga sa nasud sa Germany nagbilin og kamandoan sa konseho sa pagpahigayon og special session aron sagupon ang resolusyon.

Si Konsehal Diosdado Suico nga maoy presiding officer sa special session nga nahinabi sa Banat News miingon nga matubag na nila ang panginahanglan sa mga naigo sa baha ug mapangandaman ang bagyong Ramon.

Si Konsehal Bethoveen Andaya nga maoy chairman sa committee on budget sa konseho nga nahinabi sa Banat News nagkanayon nga ilaha pang gipaabot ang City Social Welfare and Services (CSWS) nga maoy gitahasan pagsusi sa danyos aron matino nila pilay kwartang ipagawas.

Ang CSWS miingon nga grabeng gibahaan ang barangay Subangdaku, Guizo, Banilad, Basak, Mantuyong, Tipolo, Cabancalan. Maguikay, Opao, Paknaan, Umapad, Tabok, Jagobiao, Alang-Alang, Casuntingan ug barangay Centro. Si Bise Mayor Glenn Bercede nga maoy acting mayor karon sa dakbayan sa Mandaue nga nahinabi sa Banat News mipadayag nga giandam na nila ang evacuation centers sa siyudad.

Ang mga evacuation centers nga kahiklinan sa mga molupyo mao ang Mandaue City Sports and Cultural Complex sa barangay Centro, mga publikong tulunghaan ug mga covered court sa kabarangayan. (BANAT NEWS)