Klase gisuspenso
CEBU, Philippines - Gisuspenso na ang tanang klase sa elementarya ug high school sa amihanang Sugbu nunot sa bagyong Ramon samtang ang dakbayan sa Sugbu mimando na usab sa pagkanselar sa ilang mga klase.
Si Ardin Monisit sa Department of Education (Dep-Ed) sa probinsya miisyu sa kamanduan sa tanang mga prinsipal ug magtutudlo sa tanang pampublikong tunghaan sa amihanang bahin sa Sugbu agi og pagsiguro sa kaluwasan sa mga tinun-an.
Samtang si Cebu City Schools Division Superintendent Rhea Mar Angtud mipahimangno sa mga prinsipal nga mobase gyud sa DepEd Order No. 28 sa pagsuspenso sa ilang mga klase.
Sa maong order ang prinsipal, public officials mahimong modeklarar og “localized suspension” gumikan kay sila maoy nasayod sa kahimtang sa ilang dapit.
Apan ang DepEd miingon nga ang mga ginikanan maoy adunay dakong responsibilidad pagsiguro sa kaluwasan sa ilang mga anak bisan walay suspensyon nga gimando ang tunghaan. (BANAT NEWS)
- Latest
- Trending
