CEBU, Philippines - Patay nang nakit-an sa iyang pag-umangkon ang usa ka tawong liso og pangisip kinsa naghikog sa sulod sa ilang balay sa Sitio Cabito-onan barangay Pundol sa lungsod sa Balamban niadtong Domingo sa alas 12:00 sa udto.
Ang nagpakamatay mao si Joan Jade Arnibal, 32, ulitawo ug nagpuyo sa maong lugar.
Si SPO1 Jose Ranelito Villareno sa Balamban Police Station mibutyag sa Banat News nga si Arnibal namatikdan sa iyang kabanay nga masulob-on sa milabay’ng pipila ka adlaw apan wala kini motug-an sa iyang problema.
Unya niadtong Sabado sa gabii, nakit-an pa usab kini sa iyang mga pag-umangkon nga nag-inusarang miinom og ilimnong makahubog sulod sa ilang balay.
Nianang pagkabuntag nakit-an nalang kini sa iyang tulo ka pag-umangkon nga kalit lang nahagbong ang lawas ni Arnibak sa sawog sa kusina sa ilang balay ug puwerti nilang kurata.
Didto nasuta nila nga naghikog kini pinaagi sa paghigot og pisi sa iyang liog kansang pikas tumoy gigaid sa sagbayan sa balay apan natayming usab nga paggawas sa iyang mga pag-umangkon ngadto sa kusina maoy pagkahagbong sa lawas patay ni Lariba gumikan kay naputol ang pisi nga gihikot sa ilang sagbayan.
Nasayran usab sa kapolisan nga si Arnibal adunay deperensiya sa panghuna -huna ug gani ang sagad nga barkada niini mga bata. Ang mga kabanay dili na interesado pa nga ipa-autopsy pa ang patay’ng lawas niini. (BANATNEWS)