Reklamo sa police recruit kapunitan og leksyon

CEBU, Philippines - Kapunitan og leksyon ang pagpasaka og kaso sa usa ka babayeng police recruit batok sa usa ka doktor sa PNP Regional Health Services sumala pa ni Sr. Supt. Louie Oppus, Deputy Regional Director for Operation (DRDO) sa Police Regional Office-7.

Ang 26-anyos nga babayeng gradwado sa Medical Technologist nga gikatahong anak og retiradong sundalo mipasaka’g reklamo ngadto sa Commission on Human Rights (CHR)-7 sa miaging semana tungod sa iyang kasinatian atol sa physical examination nga namolestiya siya sa doktor nga mihiling kaniya uban sa laing lima pa ka aplikante.

Giangkon ni Oppus nga sa pagkakaron kulangan gyud sila og babayeng doktor kay nangretiro na ang uban niini ug tungod sa maong reklamo nagplano silang mo-hire nalang og doktor nga babayeng maoy mo-eksamin sa mga babayeng aplikante sa pagka-polis.

Apan giklaro niya nga kadtong nahitabo sa usa ka 26-anyos walay malisya nga gihimo ang doktor sanglit kabahin kini sa proseso sa pag-apply pagka-police ug kini diha gihimo sa pribadong lawak nga nag-inusara ang doktor kauban ang nurse ug ang babayeng aplikante.

“Ubang mga babaye wala man mangreklamo he (doktor) is conducting being done in a professional manner. Kun mahimo, babaye unta ang mo-cunduct pero kuwang man ta karun kay nang-retire naman ang ubang doktor,” matud pang Oppus. Ang pamahayag ni Oppus gisuportahan usab ni Atty. Homer Cabaral, regional director sa National Police Commission (Napolcom)-7 dihang nahinabi sa Banat News.

Matud pa niya walay available nga babayeng doktor aron maoy mopahigayon sa physical examination sa mga babaye nga aplikante. Giklaro ni Cabaral nga kun dili gyud madawat sa mga aplikanteng babaye ang physical examination nga mga lalaking doktor ang mohiling kanila, alang kaniya mas maayo pang dili nalang mo-apply sa pagka polis.

Kini tungod kay tipik ug kabahin na gyud sa recruitment ang pagpaubos sa physical examination. Gihangop hinuon niya ang reklamo sa maong aplikante tungod iyaha kining katungod.

Matud ni Cabaral kun dunay igong basehanan ang reklamo sa maong babaye andam silang mopahigayon og imbestigasyon. (BANATNEWS)