Siyudad mokuha'g scuba divers

CEBU, Philippines - Gikatakdang mokuha si Mayor Michael Rama og mga scuba divers aron maoy mosusi sa mga nagkadaiyang creeks sa siyudad sa Sugbo.

Nagkanayon ang mayor nga ang maong mga scuba divers maoy mosusi sa estado sa gilawmon sa mga creeks ug mosusi kung asang mga dapita ang sagad magbara.

Sumala pa sa mayor nga gumikan sa sagunson nga pag-uwan nasinati ang grabeng pagbaha sa nagkadaiyang kadalanan sa siyudad kini sama sa barangay Tinago, Tejero T. Padilla ug Mabolo partikular na diha sa Mahiga Creek.

Samtang si Roberto "Bob" Cabarrubias misaysay nga dili pa nila masulti kung pila ka scuba divers ang ilang kuhaon sanglit aduna pa sila’y himuong panagtigom sa mga sakop sa Cebu City Risk Reduction Management Council (CCRRMC) nga gipangulohan ni Alvin Santillana.

Nagkanayon si Cabarubbias nga dako kaayo og matabang ang mga scuba divers gumikan mahibaw-an dayon kung asang dapita ang kinahanglang unahon sa pagkubkob sa mga lapok ug mga basura nga nagpundo na sa mga creek.

Sumala pa ni Cabarubbias nga sugdan dayon nila ang operasyon sa mga scuba divers sa dili madugay human sa ilang panagtigom sa nagkadaiyang departamento sa City Hall. (BANATNEWS)