Higanteng imbornal taod na

CEBU, Philippines - Plastado na ang plano sa kagamhanan sa dakbayan sa Mandaue sa pagpanglubong og mga higanteng imbornal ilabi na sa mga lugar nga pundohanan sa tubig aron malikayan ang lunop sa panahon sa ting-uwan.

Sa pagkakaron sirado na ang mga imbornal nga gagmay kaayo nga gipanglubong sa unang mga mayor sa dakbayan.

Si Engineer Florentino Nimor, pangulo sa City Planning and Development Office (CPDO) maoy gitahasan ni Mayor Jonas Cortes sa paghimo sa maong plano. 

Sa panagtagbo sa mga sakop sa City Disaster Risk and Management Council (CDRMC) kagahapon ilang gikuwenta ang mga kadaot sa kabtangan atol sa lunop nga nahitabo niadtong Biyernes ug Sabado aron basehan sa pagdeklarar og state of calamity sa mga dapit nga nasugamak sa tubig baha.

Si Mayor   Cortes nga maoy chairman sa CDRMC nakigtagbo usab sa mga kapitan sa 27 ka barangay ug gimando niini ang pagpangandam alang sa rescue operation   kun adunay lunop ug baha nga moabot sa ilang palibot. 

Sa sayo pa gipundok-pundok ang mga barangay nga gibutangan usab og mga opisyal nga maoy dali nga molihok alang sa mga rescue operation kun may katalagmang moabot sa maong mga lugar.

Sa pagpakighinabi sa Banat News kang Mario Perez nga maoy head sa Accident Control and Emergency Response Team (ACERT) iyang giila ang mga barangay nga naigo sa lunop nga naglakip sa Subangdaku, Guizo, Mantuyong, Tipolo, Ibabao Estancia, Banilad, Cabancalan, Maguikay, Basak, Looc, Umapad, Tabok, Tingob ug uban pa. (BANATNEWS)