Babaye mitulis sa taxi

CEBU, Philippines - Himabaw sa P5 mil ang kantidad sa salapi nga nasakiyo sa lalaki ug babaye kinsa mitulis sa drayber sa gisakyan nilang taxi didto sa sitio Soong, barangay Mactan, dakbayan sa Lapulapu sa miaging kaadlawon.

Ang biktima mao si Felipe Itol, 41, minyo, nga drayber sa Darwynn taxi nga nagdala sa plate number GXM 344, taga Barrio Luz sa dakbayan sa Sugbo.

Si SPO1 Jose Ruel Nalzaro sa kapolisan sa Presinto 5 sa Lapulapu City Police Office mibutyag sa Banat News  nga misakay ang duha ka pasaherong babaye ug lalaki nga pulos batan-on   didto sa merkado sa dakbayan ug nagpahatod   ngadto sa sitio Soong sa barangay Mactan sa maong dakbayan.

Apan sa ilang pag-abot sa maong lugar imbes plite ang itunol, armas de fuego maoy gition   ngadto sa biktima uban sa pagdeklarar nga tulis.

Unya gipangayo sa duha ka tulisan ang pitaka sa biktima ug gihurot og kuha ang kinitaan niini sa iyang pagpamasahero nga nagkantidad og P4,550, dayon gimandoan siya sa   pagkanaug gikan sa gimaneho niining taxi.

Dihang   didto na sa gawas ang biktima, ang lalaking tulisan maoy mimaneho sa taxi ug gipabulhot kini sa pagpadagan pahilayo sa maong dapit.

Naghinayhinay na lang sa paglakaw ang biktima hangtod nga nakasakay kini og habal-habal sa maong lugar nga maoy naghatod   kaniya  ngadto sa barangay hall sa barangay Mactan.

Matud pa ni SPO1 Nalzaro ang mga barangay tanod sa Mactan maoy mitawag sa kapolisan   ug gipahibawo sa tulis nga nahitabo. Dihang milihok ang kapolisan, napalgan nila ang taxi sa biktima nga gibilin didto sa sitio Mahayahay sa barangay Bankal sa maong   dakbayan. (WC)  (BANATNEWS)