Inasal Festival may street dancing competition

CEBU, Philippines - Mga pribado ug pampublikong tunghaan nga mosalmot isip dance contingent sa Halad Inasal Festival ang gipanghatagan og cash assistance sa kagamhanan sa dakbayan sa Talisay.

Karong Oktubre 15, 2011 (Sabado) dakbayan sa Talisay magsaulog sa kapistahan sa ilang patron nga si Santa Teresa de Avila diin atol sa maong adlaw dunay ipahigayong street dancing ug gilauman usab nga dunay mga float sa lechon ang mosalmot sa parada.

Ang dakbayan sa Talisay naila na kaayo sa lamian niining lechon baboy dili lang sa Sugbo lakip na ngadto sa laing mga lugar. Si Talisay City Administrator Richel Bacaltos sa pakighinabi niini sa Banat News nagkanayon nga siyam ka mga contingent ang mosalmot sa street dancing nga gilangkuban sa walo ka mga pampubliko ug pribadong tunghaan sa siyudad ug sa local government unit (LGU).

Matud niya nga matag tunghaan gihatagan sa syudad og P50 mil nga magasto sa ilang mga props ug costume sa mga dancers.

Karong tuiga ang unang higayon nga himuong contest ang dance presentation sa mga contingent diin tumong sa siyudad nga maningkamot ang mga mosalmot sa pagpaanindot sa ilang presentasyon.

Ang walo ka tunghaan nga mosalmot mao ang Maghaway Elementary School, Candulawan Elementary School, Divino Amori Academy, Saint Scholastica Academy, San Roque Elementary School, Lawaan National High School, Cansojong National High School ug Sister’s of Mary.

Matud ni Bacaltos nga ang street dancing magsugod kini sa ala-una sa hapon karong Sabado ug magsugod diha sa atubangan sa city hall sa barangay Lawaan agi diha sa Cebu South Coastal Road dayon moliko kini ngadto sa tuo diha habig sa San Isidro junction paingon sa barangay Dumlog lahos na ngadto sa Talisay City Central School sa barangay Poblacion diin adto ipahigayon ang dance showdown.

Si Bacaltos midugang nga si Kongresista Eduardo Gullas ug Gobernador Gwendolyn Garcia ang gilaumang motambong sa maong kalihukan.  - BANAT NEWS