Naaktuhang nagdinamita

CEBU, Philippines - Mananagat nga migamit og dinamita sa pagpanagat gidakop sa nagpatrolyang mga sakop sa Cordova Marine Watch sa kadagatan sa isla sa Hilutungan ug isla Sulpa sa lungsod sa Cordova alas-6 pasado ang takna kagahapon sa buntag.

Ang nadakpan mao si Nestor Ocaba, 54, nagpuyo sa maong dapit ug ang nakadakop mao sila si Jefril Sosias ug Seler Cañete nga mga sakop sa marine watch sa nahisgutang lungsod.

Si PO2 Samson Igot sa kapolisan sa maong lungsod nga nahinabi sa Banat News miingon nga nasakmit gikan kang Ocaba ang usa ka botelya nga puno sa pulbora, sapyaw sa isda, pump boat ug mga isda nga nakuha niini.

Matud pa ni Igot nga basin nagtuo si Ocaba nga walay magpatrolyang mga sakop sa marine watch sa nahisgotang lungsod kagahapon sayo sa buntag maoy hinungdan nga gipahimuslan usab niini ang kahigayonan gamit ang dinamita.

Sa nasayran sa Banat News nga ang maong dapit diin masikop ang suspek pipila lamang ka metros ang gilay-on gikan sa fish sanctuary sa nahisgutang dapit.  - BANAT NEWS