200 mil narehistro sa Philhealth

CEBU, Philippines - Ang kagamhanan sa lalawigan sa Sugbo nakarehistro na og kaping 200 mil ka mga pamilya sa kalungsoran alang sa Philhealth insurance ubos sa administrasyon ni Governor Gwendolyn Garcia.

Matud pa ni Integrated Provincial Health Officer, Dr. Cristina Giango nga ang pagpasiguro sa mga pamilya sa Philhealth maoy kabahin sa paghingusog   sa gobernador nga makabaton og kahigayonan ang mga kabus nga pamilya nga makapatambal sa hospital sa higayon nga magkasakit kini.

Si Giango miangkon nga sagad sa mga pamilya nga ang nahatagan sa Philhealth insurance sa kagamhanan sa lalawigan sa Sugbo mga kabus kaayo nga dili makasarang sa paggasto kun mapaslak sa tambalanan.

Gitumbok ni Giango nga ilang gipaabot nga mas molapad pa unya ang health program ni Gobernador Garcia tungod kay ang maong programa gisagop usab sa poverty alleviation program sa nasudnong kagamhanan ni Presidente Aquino nga gitawag og "Pantawid Pamilyang Pilipino Program" kon 4P's.  - BANAT NEWS