Pabrika patukoro'g MRF

CEBU, Philippines - Gitinguha karon sa kagamhanan sa dakbayan sa Mandaue nga ang matag dagkong establisamento niini may kaugalingong Material Recovery Facilities (MRF) nga maoy labing gikinahanglan sa tukmang paghipos sa basura.

Si manlalaban Benjamin Cabrido nga maoy consultant on environment   sa kagamhanan sa maong dakbayan   mipadayag sa kamahinungdanon sa MRF ilabi na sa mga dagkong pabrika sa   syudad.

Kini human masuta ni Cabrido nga ang mga dagkong pabrika sa maong lugar   maoy may labing daghan og basura itandi sa mga ordinaryong panimalay.

Si Cabrido mipasabot nga kinahanglang magpakabana ang tagdumala sa mga pabrika tungod kay giklaro kini sa Republic Act 9003 kon Solid Waste Management Act of 2001 nga ang MRF maoy tukmang sulosyon sa paglabay sa mga basura.

Gumikan niini gisugyot ni Cabrido sa mga opisyal sa kagamhanan sa Mandaue nga mopahigayon og seminar kalabot sa backyard gardening  kay usa kini sa mga paagi aron ang mga basura nga madugta pinaagi sa MRF ug mahimong abuno, anha magamit sa mga   harden sa mga tanom nga makaon sa matag palibot sa pabrika ug sa panimalay.

Pinaagi usab sa MRF makunhoran na ang mga basura sa dakbayan nga iglalabay sa basurahan niini sumala pa ni Cabrido

Kini tungod kay pinaagi sa MRF mabahig nang daan ang malata ug dili malata nga basura, sumala ni Cabrido.  - BANAT NEWS