Lasbag nga driver gibasol sa aksidente

CEBU, Philippines - Ang pagmaniho sa sakyanan nga hubog sa bino maoy usa sa gitumbok nga hinungdan   sa pagka-angol sa lima ka   tawo kinsa anaa pa sa tambalanan karon human magkadinasmagay   ang duha ka motorsiklo   didto sa barangay Papan, lungsod sa Sibonga sa miaging gabii.

Si PO3 Ederlino Bacusmo sa Sibonga Police Station mibutyag sa Banat News  nga   usa sa duha ka drayber kinsa pulos mibay-ad sa karsada sa maong dinasmagay, nagmaneho sa motorsiklo    nga hubog.

Gihinganlan ni Bacusmo si Ruben Betoro, hingkod, ulitawo nga taga barangay Bulak, lungsod sa Dumanjug   nga nagmaneho kining lasbag sa iyang habal-habal.

Ang iyang kadasmag niadtong higayona mao si Richard Lapad, 34, minyo nga taga Sibonga.

 Sumala ni Bacusmo nga si Lapad nagpaingon   niadtong higayona   sa ilang balay sa Papan gikan sa trabaho dihang nasugatan niini ang habal-habal ni Betoro nga gisakyan sa upat ka pasahero.

Gituohan ni Bacusmo nga wala makakontrolar si Betoro sa dagan sa sakyanan niini kay hubog busa nagkadasmag og ang sakyanan ni Lapad.

Busa pulos nanglupad gikan sa ilang mga sakyanan ang duha ka drayber ug sa pagtugpa niini sa karsada nangabali-bali ang ilang kabukogan uban sa mga bun-og ug samad ug naangin usab ang upat ka pasahero ni Betoro nga sila si   Raymund Arnaiz, 17, manghod niini nga si Richard 16, nga taga Cantolaroy ug Marlon Timpla, 19, nga taga Monfeller lungsod sa Argao, ug ang   wala hiilhi nga ika-upat apan wala kaayo mabun-og.

Human sa maong hitabo, gisakwat na sa mga nakasaksi ang duha ka mga drayber ug kauban sa upat ka pasahero gipanghatod sila sa mga tambalanan sa dakbayan sa Sugbo.

Ang kapolisan sa Sibonga miawhag sa mga drayber nga tumanon ang balaod nga likayan ang pagmaneho sa sakyanan kun makainom og ilimnong makahubog kay mao kini ang kasagarang hinungdan sa mga dagkong disgrasya sa kadalanan.  - BANAT NEWS