Bella moabot karong hapon

CEBU, Philippines - Ang suspetsado sa pagdagit ug pagpatay kang Ellah Joy Pique nga si Bella Ruby Santos gikataktang moabot sa Mactan International Airport karong alas 4:30 sa hapon.

Ang mga ahente sa National Bureau of Investigation (NBI) nga sila si manlalaban Arnel Pura ug  Larry Reyes maoy gitakdang mo-escort ni Santos gikan sa Manila balik nganhi sa Sugbo.

Matud ni Pura ugma (Martes) na nila ihatod si Santos ngadto sa korte sa sala ni Regional Trial Court (RTC) Judge Ester Veloso sa Branch 6 tungod kay hapon na kaayo silang naabot karon.

Base sa legal procedure ang akusado ipresentar ngadto sa korte alang sa iyang commitment order ug ang presiding judge maoy mohukom kung asa madetiner o ang akusado.

Sayo niini si Santos mihangyo nga dili magpapriso   sa Cebu Provincial Detention and Rehabilitation Center (CPDRC) kay gusto niya nga adto nga adto lang siya itanggong sa Naga City Jail kung aduna nay warrant of arrest nga iluwat batok kaniya.

Kahinumdoman nga si Santos ug ang uyab niining si Ian Charles Griffiths maoy suspetsado sa pagdagit ug pagpatay kang Pique dihang ang biktima naglakaw paingon nang mopauli gikan sa eskwelahan sa Calajo-an Elementary School sa lungsod sa Minglanilla niadtong Pebrero 8 ug pagkasunod adlaw napalgan na lang ang patay’ng lawas niini nga gihagbong sa pang-pang sa lungsod sa Barili.

Human kalutsi og warrant of arrest si Santos niadtong Hulyo 12, 2011, misibat og dul-ang tulo ka buwan nga gipangita siya sa mga otoridad hangtod nga nasikop siya sa mga ahente sa NBI didto sa Mega Mall sa Ortigas, Manila niadtong Biyernes sa hapon.

Sa laing bahin, ang abogado ni Santos nga si manlalaban Rameses Villagonzalo nagkanayon nga mopasaka sila og “petition for bail” ug “motion for reconsideration” sa omnibus motion nga ilang gi-file ngadto sa sala ni Veloso karong adlawa.

Gikwestiyon ni Villagonzalo ang desisyon ni Veloso sa pagdeklara nga “moot and academic” ang ilang omnibus motion.

“We are not satisfied with the ruling because it did not treat the merits of our motion”, matud ni Villagonzalo.

Gibutyag niya nga nadawat nila ang resolusyon sa ilang omnibus motion niadtong milabay’ng Miyerkules.

Ang depensa miduso og omnibus motion aron pagdeterminar sa probable cause sa resolusyon nga giluwatan sa three-man panel.

Ang nahisgutang panel gilangkuban nila ni prosecutor Anabelle Robles, Jose Edwin Renegado ug Maria Luisa Ong kinsa nagkanayon nga adunay tukmang sukaranan nga ipaubos sa trial ang akusado kabahin sa kamatayon ni Pique kini base sa gipresentar nga mga ebidensiya sa mga complainant.

Si Villagonzalo midugang nga moduso sila og petisyon ngadto sa korte aron makabutang og piyansa si Santos alang sa temporaryo niining kagawasan.  - BANAT NEWS