Pebrero sugdan na'g trabaho ang flyover

CEBU, Philippines - Konpirmado na nga sa Pebrero 2012 sugdan na sa   pagtrabaho ang duha ka flyover nga proyekto ning dakbayan diin usa niini anha atubangan sa Asilo dela Milagrosa sa Gorordo Avenue ning dakbayan sa Sugbo sumala ni Congresswoman Cutie del Mar sa miaging Sabado sa gabii.

Si del Mar kinsa maoy nagpapanumpa sa mga bag-ong opisyal sa Subuanong Kumentaristang Nagpakabana (SUKNA) nagkanayon nga dili na mahimong iatras ang budget alang sa duha ka flyover nga P300 milyones.

Matud niya nga   tag-Pl50 milyones ang gahin alang sa matag usa sa duha ka flyover   diin ang usa niini anha     ibutang sa eskina sa MJ Cuenco Avenue ug General Maxilom Street.

Sumala kang del Mar nga nakigtagbo siya sa mga madre sa Asilo niadtong Sabado sa hapon ug nagkasinabtanay na sila bahin sa pagsugod na og trabaho sa flyover sa atubangan sa Asilo.

Matud pa niya nga misugot siya sa gihangyo sa mga madre nga tapuson una nila ang ilang novena aron nga dili na madisturbo sa maong proyekto.

Matud pa ni del Mar nga base sa schedule niini, karon untang buwan sa Nobikyembre magsugod na ang WTG Construction sa pagkoral sa maong lugar aron sugdan na ang pagtrabaho niini.

Hinuon sa master plan nga iyang gidamgo agi og duyog sa mga plano sa mga dagkong negosyante ning dakbayan, sa iyang atubangan nabati niya ang pintok nga pamahayag ni Kongresista Osmeña kinsa miingon I don’t believe in master plan”.

Gibasi ni Osmeña sa iyang mga kasinatian nga kining mga natarok nga mga proyekto sa syudad sukad sa iyang pagka-mayor nahimo mugna sa iyang mga laraw ug imahinasyon.   - BANAT NEWS