Nag-sideline og marijuana nadakpan

CEBU, Philippines - Pwerteng demalasa sa usa ka babayeng negosyante og kan-anan human kini gidakop sa polis nga nangompra sa merkado dihang naaktuhan niini ang suspek nag-sideline pud og pamaligya og mga linikit nga dahon sa marijuana diha sulod sa Sibonga Public Market sa barangay Poblacion sa maong lungsod niadtong Biyernes sa ala 1:00 sa hapon.

Ang nadakpan mao si Zenaida Dingding, 48, nagpuyo sa maong lugar ug nanag-iya og karenderya sa maong merkado, apil sa gidakop ang lalaking giingong naaktuhang mipalit og marijuana kang Dingding nga si Wilson Uy, 29, taga barangay Poblacion.

Matud ni PO1 Jose Palmero sa Sibonga Police Station dihang nahinabi sa Banat News, si PO2 Roque Senarillo nga off duty niadtong tungura ang paingon untang mangompra sa merkado.

Apan iyang nakit-an ang suspek nga nagdumala og karenderya nga mitunol og mga linikit nga marijuana nga giporma og sigarilyo ngadto sa kustomer niini hinungdan nga iyaha kining giduol ug giaresto ang duha. Nakuha gikan ni Dingding ang lima ka linikit sa marijuana ug duha ka linikit sa marijuana kang Uy.

Ang duha gikatakdang pasakaan og kasong kalapasan sa RA 9165. (BANATNEWS)