Miikyas sa Mambaling police station nadakpan

CEBU, Philippines - Nasikop sa kapulisan sa Pari-an Police Station ang usa ka pugante gikan sa detention cell sa Mambaling Police Station diha sa Sanciangko St. niadtong Sabado sa buntag.

Ang puganti giila nga si Jerome Martinez alyas Insik, 28, taga siyudad sa Bogo kinsa nag-atubang og kasong paghupot og ilegal nga drugas.

Matud pa ni SPO1 Rey Iligan sa Pari-an Police Station nga maoy nakadakop kang Martinez iya kining nakit-an sa Osmeña Blvd. ug tungod kay notado na kini nga tulisan, iya kining gisundan.

Apan midagan si Martinez human makabantay kang Iligan hinungdan sa nahitabong ginukdanay ug naabtan sa dalan Sanciangko St. ning dakbayan.

Dugang pa ni Iligan, kining maong puganti nakaikyas gikan sa Mambaling sa kaso nga iligal nga pagkupot og drugas niadtong Septiyembre 18. Nakuhaan ni Iligan og usa ka kutsilyo si Martinez. Sumala pa sa mga polis sagad manulis si Martinez diha sa may South Bus Terminal.

Usa ka Lorna Florez ,49, nga taga barangay Tejero ning dakbayan usa sa mireklamo batok kang Martinez nga maoy mitulis kaniya ug nakuha ang iyang bulawang kwintas niadtong adlaw’ng Miyerkules. (BANATNEWS)