Mga barangay sa Mandaue gibahaan

CEBU, Philippines - Nakamugna og grabeng pagbaha sa kabarangayan sa dakbayan sa Mandaue ang kusog nga pagbunok sa ulan nga nagsugod sayo pa sa miaging gabii nga ang tubig baha mas lawom pa sa nahitabo niadtong Enero 25 niining tuig.

Si Mario Perez nga maoy pangulo sa Accident Control and Emergency Response Team (ACERT) sa dakbayan sa Mandaue nga nahinabi sa Banat News miingon nga hilabihan ang pagdako sa tubig sa miaging gabii kay naabot man sa baha ang mga barangay nga wala maabot sa baha niadtong Enero 25 niining tuiga.

Ang pagbaha niadtong Enero 25 nga nahitabo sa adlawan pa miabot sa taga hawak ang tubig ug adunay ubang lugar abot sa dughan ug lapas sa tawo tungod sa kalawom niini.

Ang gibahaan og maayo niadtong milabay’ng gabii mao ang dalan A.S. Fortuna sa barangay Banilad ug dili kaagian og sakyanan. Ang mga sakop sa ACERT ug Barangay Disaster Volunteer Brigade miresponde sa maong dapit ug mitabang sa pagpalabang sa mga tawo.  

Matud pa ni Perez gibahaan og maayo ang barangay Mantuyong, Guizo, Looc, Tipolo, Subangdaku, Umapad, Basak, Ibabao Estancia, Banilad, Maguikay,   Tabok, Alang-Alang ug uban pa. 

Sa grabe nga pagbaha dili lang mga balay ang gisudlan sa tubig sa miaging gabii kondili lakip na usab ang mga buhatan sa dagkong establisamento nga naglakip sa mga bodega sa bugas ug uban pa.

Wala hinuoy natalang nakalas sa maong hitabo ug giisip kini ni Perez nga tungod sa pagpangandam sa publiko.(EIM) (BANATNEWS)