Problema sa trapiko sulbaron

CEBU, Philippines - Ang kagamhanan sa dakbayan sa Talisay padayong nagtuon aron masulbad kining   paghuot sa trapiko sa barangay Tabunok bisan gitak-opan na ang merkado publiko sa maong lugar.

Matud pa ni Vice Mayor Alan Bucao nga naggumikan kini sa pagkasentro sa maong dapit ilabi na ang ilawom sa flyover diin anha kasagarang manaog ug mosakay ang mga pasahero nga moadto sa bag-ong merkado sa Lagtang o kaha mga pasahero nga moadto sa Poblacion Talisay ug uban pang barangay sa maong dakbayan.

Si Bucao, kinsa maoy chairman sa City Traffic Operation Development Administration (City-TODA) nagkanayon nga gipangitaan nila karon og sulusyon ang maong problema. Nakita sa bise mayor nga usa sa nakapahuot sa Tabunok mao ang kadaghan sa mga traysikol nga anha    mag-atang og mga pasahero sama gihapon niadtong diha pa ang merkado.

Apan matud niya nga base sa ilang nasayran kasagarang mga traysikol nga   magtampunsisok sa maong lugar ug magpabadlong mao kadtong mga walay franchise.

Unya ang mga traysikol nga may franchise dili usab magpabintaha hinungdan nga ang mga traysikol mas daghan pa kay sa mga pasahero nga maghuot sa maong lugar.

Miingon si Bise Mayor Bucao nga ilang paninguhaon nga mahawan ang mga traysikol nga walay permiso sa pagpamasahero aron nga dili na kini makadugang pa sa kahuot sa trapiko sa Tabunok. (BANATNEWS)