Lola nadugta anak gipriso sa kwarto

CEBU, Philippines - Usa ka 76-anyos nga lola ang napalgang patay ug nadugta na diha sa sulod sa pinuy-anan niini nga gituohang gitulis ug pagkahuman gipatay samtang gipriso sa usa ka lawak ang anak niining may kakulian sa pangisip kapin usa ka semana na ang nakalabay diha sa sitio Banahaw barangay Talaga sa lungsod sa Argao napalgan ni niadto lang Biyernes sa alas 5:30 sa hapon.

Ang biktima mao si Beatriz Villegas Lao, 76, usa ka pensyonada ug nagpuyo kauban ang usa ka anak niini nga may kakulian sa pangisip kinsa gitanggong sa mga kriminal sa usa sa mga lawak.

Matud ni PO1 Eugenio Sarabello sa Argao Police Station dihang nahinabi sa Banat News subay sa imbestigasyon diha sa sulod sa kwarto sa biktima kini napalgan.

Dako ang pagtuo sa kapolisang gipatay kini tungod sa nagpasad nga mga nabagtok nga pat-ak pat-ak sa mga dugo sa sawog.

Nagtuo usab silang gitulis ang biktima ug pagkahuman gipatay pinaagi sa pagbunal og gahi nga butang sa ulo niini sanglit walay nakabati og buto sa armas sa mga silingan niini sa mga nilabay’ng mga adlaw.

Wala isalikway ang anggulong gitulis usab kini tungod kay abli na ang mga drawers niini apan wala usab nila masiguro kung adunay nakuha ang mga kriminal.

Matud ni Sarabello nga ilang nadiskubrehan nga giguba ang luyong bahin sa pultahan sa pinuy-anan sa biktima ug didto moagi ang mga kriminal.

Ang anak sa biktima nga gibilanggo sa pikas kwarto ug pwerte nang luyaha ug gigutom tungod sa kapin usa ka semanang wala nay nag-atiman. Ang biktima mao ray nag-atiman sa anak tungod kay ang uban niining mga anak aduna nay mga kaugalingong pamilya ug namuyo na sa siyudad sa Sugbu.

Matud ni Sarabello ang mga silingan sa biktima maoy nakatimaho og grabeng kabaho gikan sa balay sa biktima sulod na sa pipila ka adlaw ug sa maong mga adlaw wala na usab nila kini igkita pa.

Tungod sa pagduda ilang gipahibalo ang ilang barangay kapitan kinsa maoy misusi sa balay ug dihang nadiskubrehan ang krimen mitawag dayon sila sa kapolisan. Ang hepe sa Argao Police Station nga si Chief Insp. Alejandro Batobalonos ug mga sakop miadto na sa dakbayan sa Lapulapu aron pagpangita sa tawong maoy ilang gidudahang mihimo sa krimen nga wala nila hinganli.

Si SPO2 Eliezer Monte ang imbestigador sa maong kaso nagkanayon nga niadtong Septiyembre 16 midangop si Lao sa ilang buhatan ug mipa-blotter batok sa tulo ka tawong nangawat sa iyang mga manok.

Gikatakda untang husayon karong adlawa ang duha ka habig diha sa barangay. (BANATNEWS)