Usa sa mitulis sa M. Lhuillier nailhan

CEBU, Philippines - Positibong giila sa driver sa Yellow taxi ang usa sa upat ka tawo nga mitulis sa duha ka opisyal sa M. Lhuillier didto sa Airport road Brgy. Pusok dakbayan sa Lapulapu sa milabay’ng adlaw diin gidudahan sa kapolisan nga usa ka “inside job”.

Matud pa ni Lapulapu City Police Office Director P/SSupt. Anthony Obenza nga ang drayber nga si Eduardo Pabonita nga maoy nagmaneho sa yellow cab sa MCIA nakaklaro kaayo sa maong dagway dihang gipakita siya sa kapolisan niini, tungod kay mao kadtong tawhana ang mition kaniya og armas ug mipakanaog kaniya gikan sa iyang lingkoranan sa taxi. Hinuon dili pa ikabutyag ni SSupt. Obenza ang ngalan sa maong suspek gumikan sa pagtoo nga nia pa kini sa lalawigan sa Sugbo sa pagkakaron.

Gipadayag usab ni Obenza nga gikan sa Mindanao ang maong suspek ug ila pang gisusi kung kauban ba kini sa mga tulisang mitulis sa pito ka mga kawani sa M. Lhuillier sa miaging Abril ning tuiga.

Samtang gipasabot ni Obenza nga gumikan sa mga sirkumstansya nga ilang nakita, dako sila og pagtuo nga “inside job” ang maong hitabo.

Apan midugang ang hepe sa kapolisan sa Lapulapu nga ilang ligiron og imbistigar ang duha ka manager sa M. Lhuillier kinsa maoy nabiktima sa maong tulis. Samtang si Mayor Paz Radaza sa iyang bahin nanghinaut nga masulbad pagdali ang maong kaso aron dili kini makaapekto sa natad sa turismo sa dakbayan sa Lapulapu.

Mitambag usab si Mayor Radaza ngadto sa management sa M. Lhuillier nga mohimo usab og mga safety measures sa pagdala nila og mga dagkong kantidad sa alahas gikan sa tugpahanan ngadto na sa ilang buhatan dinhi sa Sugbo. (BANATNEWS)