Mipatay sa bata gikasuhan na

CEBU, Philippines -  Gipasakaan na kagahapon sa kapolisan og kasong murder ug kidnapping with serious illegal detention ang suspetsado sa pagpatay kang Mario Morales, 7, nga si Mario Abecia, 42.

Sa extra-judicial confession ni Abecia pabilin niyang gibarogan nga wala niya tuyoang mapatay ang bata apan giangkon nga iyang gigapos ang tiil ug kamot niini og packaging tape niini ug gibilin nga nag-inusara ibabaw sa kama .

Matud pa niya iyaha unta kining gamiton aron makigbalik kaniya ang inahan sa bata nga mibuwag na kaniya.

Si Assistant Prosecutor Benvienido Mabanto sa buhatan sa piskalya sa iyang pagpasabot kang Abecia nga ang gipirmahan nga pahayag moresulta kini sa bug-at nga kaso nga iyang atubangon sa korte.

Bisan pa sa mga pagpasabot ni Piskal Mabanto kang Abecia apan sa gihapon padayon niining gibarogan ang iyang pamahayag ug miluhod uban ang og pasaylo sa atubangan sa inahan sa biktima.

Si Arcenio Ursal nga higala ug silingan ni Abecia lakip sa gipasakaan sa maong kaso taliwala sa pagbakwi sa nahaunang pamahayag ni Abecia nga wala kini labot sa krimen.

Sa unang imbestigasyon nga gihimo nila ni Inspector Ramil Morpos sa Investigation Detection and Management Bureau (IDMB) sa Mandaue City Police Office (MCPO) kang Abecia mitug-ang si Ursal maoy iyang gisugo pagpalit og packaging tape nga maoy iyang gigamit sa paggapos sa bata.

Gibakwi unta ni Abecia ang una niyang pamahayag apan bisan pa man niini lakip pa gihapon kini sa gipasakaan og kaso,

Si Abecia dihang nahinabi sa Banat News  mipadayag usab og kabalaka nga mapanimaslan sa amahan sa biktima kun mabalhog na kini sa Mandaue City Jail.

Matud pa niya nga sa maong bilanggoan usab mabilanggo ang amahan sa biktima nga nadakpan sa kapolisan sa paghupot og illegal nga drugas sukad pa niadtong tuig 2009. (BANATNEWS)