Naghikog sa eskuylahan

CEBU, Philippines - Usa ka 13-anyos nga tinun-an sa grade-6 ang naghikog sa luyong bahin sa ilang tunghaan tungod sa giingong kaguol niini nga wala paliti og uniporme nga iyang gamiton isip usa ka Boy Scout.

Ang bata (pangalan gipugngan sa Banat News) giingong nagpakamatay pinaagi sa paghikog sa iyang liog diha sa luyong bahin sa tunghaan sa Maghanoy Elementary School sa barangay Maghanoy sa lungsod sa Barili niadtong Miyerkules sa alas 3:00 sa hapon.

Matud ni PO2 Ildefonso Cutas sa Barili Police Station dihang nahinabi sa Banat News ang maguwang sa bata maoy nakadiskubre sa patay’ng lawas niini.

Giingong nagbitay na kini sa punoan sa mangga sa luyong bahin sa tunghaan nga may higot nga nylon sa liog ug maoy gituohan sa mga imbestigador nga nakaingon sa iyang kamatayon.

Atol sa gihimong pagsukit sukit sa kapulisan ngadto sa apohan sa bata walay laing gikagul-an sa naulahi ning mga nakalabay’ng mga adlaw mao ang uniporme sa Boys Scouts kay wala pa kini mapaliti ug gusto gyud niining moapil sa maong kalihukan sa ilang tunghaan.

Sumala pa ni Cutas wala nay ginikanan nga kaduolan ang bata tungod kay nagkabuwag ang ilang inahan ug amahan maong sa ilang apohan nalang nagpuyo ug maoy nag-atiman ug nagpaeskuwela kanila.

Matud pa nga misuway og hangyo ang bata sa apohan apan human pahibaw-ang walay kwarta ang apohan nga ikapalit sa uniporme milakaw kini ug wala na mouli dihang ilang gipangita ug nakit-an nalang nilang nagbitay na kini sa mangga diha sa eskuylahan. (EIM) (BANATNEWS)