CEBU, Philippines - Unom ang naangol ug usa ang talandugon ang kahimtang human magbangga ang duha ka motorsiklo sa tungasong bahin sa sitio Obayan barangay Baring lungsod sa Carmen niadtong Miyerkules sa alas 6:30 sa gabii.
Ang drayber sa unang motorsiklo nga Honda XRM kolor puwa mao si Joan Bernejo, 23, ug angkas ang iyang amahang si Joe Bernejo, 48, ug igsoong si Anjun Bernejo pulos mga molupyo sa barangay Cantipay.
Samtang ang gikabangga niining Honda XRM gihapon kolor blue gimaneho ni Junvic Talisay, 21, ug iyang angkas sila si Jaymark Singson ug Ronie Nagalada pulos mga molupyo sa barangay Cantumog.
Matud ni SPO2 Anilo Laurente, desk officer sa Carmen Police dihang nahinabi sa Banat News si Bernejo gikan sa bukid ug paingon nga modulhog sa lungsod samtang si Talisay paingon nga motungas dihang sila nag-abot sa maong dapit ug nagkabangga.
Ang tanang pasahero ug drayber sa duha ka motor pulos gipanghatod sa Danao City District Hospital apan si Bernejo gilahos sa tambalanan dinhi sa dakbayan sa Sugbo tungod kay maoy nagrabehan. (BANATNEWS)