Bawal manigarilyo sa Colon area

CEBU, Philippines - Gikatakdang ipatawag ang mga tagdumala sa mga balay patigayon sa Sugbu aron hisgutan ang mga importanteng ipatuman nunot niining paghingusog sa Anti Smoking Ordinance sa siyudad.

Ang representante sa siyudad sa Task Force Cancer of the City of Cebu (TCCC) nga si Dr. Lucille Mercado miingon nga kinahanglang mapasabot ang mga negosyante sa tumong niini. Giklaro usab ni Mercado nga higpit nga gidili ang pagpanigarilyo sa labing karaang dalan sa tibuok Pilipinas nga mao ang Colon Street ug sa palibot niini.

Ang maong makasaysayanong dalan panahon pa sa katsila dugokunon og mga tawo matag adlaw. Si Mercado nagkanayon nga ang establisamento kinahanglang mobutang gyud og lawak nga himuong smoking area.

“Kinahanglan kanang dunay pultahan, unya dili agian sa mga tawo,” nagkanayon si Mercado.

Sumala pa niya nga dili smoking area ang kasilyas gumikan kay sudlan kini sa daghang mga tawo nga maoy sagad himuon sa mga manigarilyo.

Pagkakaron wala pa’y mahatag nga figure si Mercado kung pila na ang ilang nadakpan sa anti-smoking ordinance.

Kahinumduman nga gihingusgan ni Mayor Michael Rama ang kampanya sa pagsumpo sa mga tawong magpataka og bulhot og sigarilyo ilabi na sa mga pampublikong lugar.

Gipadayag sa mayor nga gusto siyang mapatuman gyud ang anti-smoking ordinance aron mapanalipdan ang panglawas sa tawo ilabi na sa dili manigarilyohay nga maoy mas daling masakit tungod sa second hand smoke. (EIM) (BANATNEWS)