Kagawad mireklamo'g 'harassment

CEBU, Philippines - Mireklamo og harassment ang usa ka kagawad sa barangay batok sa mga polis nga nangronda nga misangpot sa pagkawagtang sa P20 mil kapin nga   cash nga halin sa ilang mga baligyang herbal    sulod sa ilang balay sa Rizal St., barangay-6, dakbayan sa Tanjay, Negros Oriental niadtong Lunes sa gabii.

Si Brayan Regalado, 31, ulitawo apan adunay kapuyo, ug kagawad sa barangay sa maong lugar   sa interview sa Bantay Radio mibutyag nga gidakop siya sa kapolisan sa Tanjay atol sa maong ronda sa pasangil   nga siya coordinator sa swertres.

Matud pa ni konsehal Regalado nga ang kapolisan sa Tanjay City Police Station nga gipangulohan ni SPO4 Rustam Grefalde nga maoy team leader uban sa iyang mga kaubang polis mironda sa ilang pinuy-anan dala ang search warrant nga giluwatan sa Tanjay City Regional Trial Court Branch 43.

Ang mga butang nga giingong ilang nasakmit gikan sa iyang balay mao ang mga paraphernalias sa swertres, ug cash nga P5,672.00 ug gisikop nila ang maong kagawad ug gibalhog sa prisohan niadtong tungora.

Sa maong interview sa kahanginan pinaagi sa telepono si Kagawad Regalado miakusar   nga ilegal ang pagka-aresto   kaniya busa mibahad kini nga   mosumbalik siya sa pagpasaka og kaso batok nila ni SPO4 Grefalde ug mga kaubanan.

Giangkon sa kagawad nga kaniadto nga usa pa siya ka sibilyan nag -coordinator siya sa ilegal nga sugal apan human siya mapili sa pagka- kagawad sa barangay election niadtong Oktobre 2010 wala na siya mag-apil- apil niini.

Matud pa ni kagawad Regalado nga nahibong siya kung diin ang mga nakuhang paraphernalias sa swertres nga sugal gikan kang Jocelyn Quipot   nga iyang kapuyo nga unta wala man mag-apil-apil ning maong sugal sulod na sa dugay -dugay na nga panahon.

Iyang gidugang nga illegal usab ang gihimong pagpangronda sa kapolisan sa iyang pinuy-anan niadtong gabhiona tungod kay wala dayon kini makapakita og search warrant ug gani milanat pa og hapit duha ka oras una miabot ang maong search warrant, apan human na nila   sakmita ang mga butang uban ang cash, ug gihasi pa ang iyang  mga sakop sa pamilya.

Gibutyag usab ni kagawad Regalado   nga kapin P20 mil ang tanang kuwarta nga gisakmit sa kapolisan nga halin sa mga produkto nilang herbal nga baligya apan P5,672   ray gitug-an sa kapolisan. (BANAT NEWS)