Mipatay sa 7 anyos gikasohan na

CEBU, Philippines - Giduso na sa kapolisan kagahapon ang kasong kidnapping with murder batok ni Mario Abesia   ang mipatay sa 7 anyos nga batang lalaki didto sa iyang balay sa barangay Subangdaku dakbayan sa Mandaue sa miaging adlaw.

Si Abesia nga gi-interview   sa mga tigbalita igo nalang  mipahungaw sa iyang mga pagmahay sa iyang pagpatay si Gabriel Morales, 7-anyos nga taga sitio Lemonsito sa barangay Umapad ug tinun-an sa grade 2 sa Opao Elementary School sa dakbayan sa Mandaue.

Niadtong Martes sa udto, si Abesia   wala kini moangkon nga siya maoy mipatay sa bata.

Apan kagahapon sa buntag sa interview sa DyHP si Abesia misaysay nga gibaatan niya og masking tape ang mga kamot, tiil ug nawong sa bata una kini patya.

 Matud niya   nga sayo sa gabii niadtong Sabado human niya kuhaa ang bata gikan sa balay sa inahan niini nga si Christine Morales naghagwa-hagwa pa siya ug ang bata sulod sa iyang balay hangtud nga ihaya kunong gipikpikan aron makatulog ang bata.

Unya dihang nakatagpilaw na ang bata, iyang gihinay-hinayan og baat ang kamot ug tiil niini sa masking tape ug dayon iyang gisunod ang pagbaat ang nawong ug ulo niini dayon iya kining gialihan aron dili kini mahulog sa semento.

Dayon   iya kining gibiyaan kay matud pa niya iyang gipangita ang inahan niini ug ang lalaki nga iyang gidudahang gikarelasyon niini kay iya kining patyon. Si Abesia nga gitanggong na karun sa detention cell sa Subangdaku Police station nahadlok pag-ayo sa iyang seguridad sa higayon nga siya adto na mapriso sa City Jail sanglit ang amahan sa bata nga si Manuel Punzalan tua usab didto prisoha sukad pa niadtong Disyembre 2009 sa kasong may labot sa illegal drugs.

Matud ni Abesia nga mas maayo pang adto nalang siya prisoha didto sa Muntinlupa kay mas luwas ang iyang kaugalingon didto kaysa diha sa City Jail. (BANAT NEWS)