Konsehal sa San Roque gipusil angol

CEBU, Philippines - Naluwas sa tino nga kamatayon ang usa ka konsehal sa barangay San Roque siyudad sa Sugbo human kini banhigi sa duha ka wala hiilhing lalaki nga nagsakay og motorsiklo didto sa New Imus Road corner P. del Rosario Extention sa barangay Lorega San Miguel sa miaging gabii.

Si Emmanuel Bobby Morados, 63, nga taga San Roque igo lang naigo sa wala niyang bukton sa duha ka bala nga miigo sa bildo sa driver’s side sa gimaneho niyang Pajero.

Si Emma nga asawa ni Morados kinsa naglingkod tupad niya wala maigo sa bala.

Matud sa mga tanod nga gikan si Morados sa iyang tindahan sa dalan Logarta ug paingon nang mopauli sa barangay Lahug diin may balay usab kini didto.

Samtang nagsubay sila sa nahisgutang lugar kalit lang miabot ang duha ka lalaking nagsakay og motorsiklo kolor itom nga pulos nagsul-ob og sirado kaayong helmet ug ang angkas niini maoy mipusil makaduha ka higayon tumong sa driver’s side.

.Si Mayor Michael Rama nga gikan mitambong og kalihokan sa Cebu City Medical Center (CCMC) natayming nga nahiagi sa maong lugar ug nakahibawo sa maong hitabo busa dali kining mitawag og Mobile Patrol aron marespondihan ang maong hitabo.

Ang mga back-up sa mayor mao nay mihatud ni Morados ngadto sa pribadong tambalanan.

Si PO2 Cristobal Geronimo sa Homicide Section sa Cebu City Police Office (CCPO) nagkanayon nga tapsing lang ang igo ni Morados sa iyang bukton. (BANAT NEWS)