2 gipamusil patay sa pista sa Dumanjug

CEBU, Philippines - Duha ang patay usa niini negosyante sa pagpamusil didto sa barangay Poblacion sa lungsod sa Dumanjug kagahapon sa kaadlawon sa managlahing oras.

Ang mga biktima mao sila si Habagat Rosales, 26 anyos, ulitawo nga taga barangay Looc, Dumanjug ug Sandy Bandolon, hingkod, minyo, usa ka negosyante, nga taga barangay So-ong siyudad sa Lapulapu.

Si PO2 Belocura sa Dumanjug Police Station mibutyag sa Banat News nga si Rosales nagtan-aw og disco daplin sa karsada sa mga alas 12:00 pasado sa kagabhion.

Apan kalit lang kining gipusil sa tulo ka wala hiilhing mga batan-on kinsa misibat dayon human mahagba sa yuta ang biktima.

Bingkil sa diskohan ang gisubay nga motibo sa maong pagpamusil tungod kay gika-report nga aduna kini gikabingkil sa diskohan nianang sayo pang gabii.

Samtang pagka-alas 5:00 sa kabuntagon si Bandolon giingong gidul-itan kini og pusil sa wala hiihing kriminal sulod sa tolda sa mga baligya niining tsinelas sa daplin sa karsada.

Subay sa inisyal nga imbistigasyon ang biktima may  gikalalis nga usa sa iyang mga kustomer nianang   sayo pang gabii.

Padayong gisusi sa kapolisan ang maong mga hitabo ug gipangita pa karon ang mga kriminal. (BANAT NEWS)