Kawani sa M Lhuillier gitulis

CEBU, Philippines - Milampos ang upat ka tawong nagpailang sakop sa PDEA sa pagtulis sa duha ka kawani sa M Lhuillier sa dalan ML Quezon Highway corner Airport Road sa Barangay Pusok dakbayan sa Lapulapu kagahapon sa buntag.

Ang mga biktima mao sila si Roberto Achurra, 42, minyo, nga taga Climaco St., dakbayan sa Toledo, usa ka Regional Manager sa M Lhuillier branch sa Davao City, John Arnel Desierto, 46, minyo, nga taga barangay Sta. Lucia, lungsod sa Asturias, ug maoy Area Manager sa M Lhuillier sa Davao.

Matud pa ni Lapulapu City Police Office Director P/SSupt. Anthony Obenza nga kadudahan ang mga panghitabo nga naglimin sa maong hitabo.

Base sa imbestigasyon sa Theft and Robbery Section (TRS) sa kapolisan sa Lapulapu sa Mactan Cebu International Airport (MCIA) sila si Achurra ug Desierto gikan sa Davao mga alas 10:45 kagahapon sa buntag ug sa pagluwan niini sa usa ka yellow taxi nga gimaneho ni Eduardso Bacalso Pabonita, hingkod nga taga sitio Carajay, barangay Gun-ob dakbayan sa Lapulapu may kargamento kining    duha ka bag nga puno sa mga alahas nga gibutang sa baggage compartment sa maong taxi.

Unya pag-abot nila sa may traffic light sa ML Quezon highway ug Airport road duol sa Marina Mall, gipara sila og upat ka tawo nga nagbonet ug nagpaila nga mga sakop sa PDEA. Mideklarar kining ang tuyo nila mao si Pabonita sa pasangil nga nagdala kini og illegal drugas dayon gikuha niini ang duha ka bag nga kargamento sa duha ka pasahero dayong sirit pahilayo ug gibiyaan ang mga biktima sulod sa taxi.

 Apan si SSupt. Obenza nagduda nganong halos magkadungan ang biktima ug ang duha niini ka abogado sa pag-abot sa ilang buhatan human sa maong tulis.

 Susama sa nahitabo   niadtong Abril ning tuiga, ang mga biktima wala gihapon mohatag sa tukmang kantidad sa mga alahas nga nadala sa mga tulisan.

 Nasagmuyo usab si Obenza kay aduna silay kasabutan uban sa M Lhuillier management human tulisa ang mga kawani niini niadtong Abril nga kun aduna kini mga alahas nga dagko og kantidad nga dad-on nganhi sa   Sugbo kinahanglang mopahibawo kini sa kapolisan aron kahatagan na sila og proteksyon gikan sa tugpahanan sa Mactan hangtod sa   padulngan niini sa dakbayan sa Sugbo.

Gumikan niini mibahad si Obenza nga palawman pa nila ang ilang imbistigasyon ning   maong kaso kay tulo na kahigayon nga ang M Lhuillier gitulis sa dakbayan sa Lapulapu nga susama ang patern niini diin   ang tanang biktima gikan sa tugpahanan sa MCIA ug atangan kini sa ML Quezon highway ug sulod lang sa pipila ka segundo mahuman dayon ang tulis.

Susihon usab sa kapolisan kun dili ba matawag nga inside job ang maong hitabo.

Sa milabay’ng Abril 5 ning tuiga nasuta nga mga sakop sa Ozamis boys ang responsabli   sa tulis nga nahitabo gihapon sa mga kawani sa maong prendahanan apan namingaw ang maong hitabo.

Samtang mitunga dayon kagahapon sa buhatan ni Obenza sila si PDEA 7 Intelligence Officer 3 Mark Maramba ug PDEA K9 Chief Carlito Ermac ug mipadayag nga ang unipormeng itom nga blazer nga gigamit sa mga suspetsadong nagpailang PDEA wala na nila kini gamita sa ilang operasyon karon kay aduna na sila’y bag-ong uniporme.

Gipadayag usab ni PO3 Maramba nga dili nila kinaiya ang pagronda sa usa ka drug suspect sa kadalanan ug sa ilang mga operasyon magsul-ob gayud sila og ID sa PDEA. (WC)(BANAT NEWS)