Gas station robbery usa patay

ORMOC CITY ,Philippines  – Patay ang usa ka gasoline pumpboy samtang napusilan usab ang kahera atol sa pagpanulis sa usa ka gasolinahan sa barangay Cogon sa maong dakbayan kagahapon sa udto.

Giila sa mga awtoridad ang nakalas mao ang usa ka “Junjun” Maloloy-on, kinsa namatay diha-diha samtang naangol ang kaherang si Julie Pepito.

Napakyas hinuon ang mga tulisan nga makadala og kwarta gikan sa cashier’s booth human usa sa mga kahera nga si Alberto Barquera misukol ug midagan dala ang sudlanan sa kwarta hinungdan nga miikyas ang mga tulisan.

Sumala pa sa report nga dihang misulod sa cashier’s booth ang usa sa mga tulisan ug napusilan niini si Pepito sa tangkugo ug miungot ang bala sa ulo niini diha na makig-ilog sa armas si Barquera sa tulisan hangtud nga nabuhian kini sa naulahi ug nakahigayon si Barquera pagdagan dala ang bulsitang gisudlan sa halin.

Ang tulisan misuway og pusil kang Barquera apan nakadagan ug nakatago na kini hinungdan nga naratol ang tulisan ug midagan nga gisundan dayon ni Maloloy-on kinsa napusilan ug napatay sa backup. Usa ka babaye ang giilogan og motorsiklo sa mga tulisan nga maoy ilang gisakyan pag-ikyas.

Tulo ka mga lalaki ang nadakpan diha sa barangay Benolho, Albuera, Leyte nga utlanan sa maong siyudad ug Albuera atol sa hot pursuit operations nga gipangulohan ni city police director Nilo Donayre. - (BANAT NEWS)