Gi-relocate nga mga pamilya giabog na usab

CEBU, Philippines -  Nangayo og katin-awan sa kagamhanan sa siyudad sa Sugbo ang mga sakop sa Sitio San Isidro II Neighborhood And Homeowners Association nga kasamtangang gi-temporaryong gi-relocate sa Block 27 sa barangay Mabolo.

Sa gipadalang suwat sa presidente sa maong asosasyon nga si Gemma Rosaceña kini misaysay nga gimandoan na sila sa hepe sa Squatters Prevention Encroachment and Elimination Division (Speed) nga si Noel Artes nga pahawaon na sa ilang giistaran. Matud pa sa suwat gisultihan sila ni Artes nga nalapas na ang lima ka buwan nga pagpapuyo kanila sa maong dapit nga nalatid sa ilang kasabotan kaniadto.

Ang maong mga molupyo mao ang mga namuyo kaniadto daplin sa Mahiga Creek nga giabog tungod sa peligrong nagpaabot kanila panahon sa ting-uwan.

Apan nagkanayon si Rosaceña nga tulo ka buwan palang sila kapin nga nagpuyo sa maong lugar maong nahibulong sila nganong papahawaon na sila sa ilang giistaran.

Ang kapin sa 32 ka pamilya sa mga nag-istar sa Block 27 misaysay nga ang kasabotan nila kaniadto sa dakbayan nga mohawa lang sila sa maong lugar kung duna nay ihatag nga permanenteng relocation site ang siyudad kanila.

Ang mga sakop sa maong asosasyon gitanyagan na sa dakbayan og relocation site sa barangay Talamban apan wala nila kini dawata ug nangreklamong maglisod sila og bayad sa P900 ngadto sa P1,000 matag buwan. - (BANAT NEWS)