Rama wa mahulga sa kihang giatubang

CEBU, Philippines -  Wala mahulga si Mayor Michael Rama sa kiha nga indirect contempt of court nga gisang-at sa mga kaliwat sa mga Rallos ngadto sa hukmanan.

Ang mayor mibutyag sa mga tigbalita nga giandam na sa iyang mga abogado ug siya mismo ang iyang kaugalingon aron atubangon ang maong kiha nga gipasaka ni Lucila Rallos, usa sa mga sumusunod sa katigayonan ni Reverendo Padre Vicente Rallos.

Ang maong kaso naggumikan sa pamahayag ni Mayor Rama nga napatik sa pamantalaan niadtong Hulyo 13, 2011 kalabot sa giingon sa mayor nga ang mga Rallos wala makabayad sa husto nilang bayranan sa buhis   sa ilang    yuta.

Gani matud pa ni Rama nga tungod kay wa niya hikit-I ang maong luna dili makatarunganong bayran ang usa ka butang nga wala makita.

Ang pamahayag ni Rama gihimo dihang gimandoan na ang kagamhanan sa dakbayan sa pagbayad sa lote sa mga Rallos sa kantidad nga P133 milyones kapin. Gibase kini sa napamatud-an sa korte nga gigamit sa kagamhanan sa siyudad ang maong luna isip right of way.

Gawas kang Rama, gilakip usab pagkiha ang Chief of Reporters Doris Bongcac ug Editor-in-Chief Eileen Mangubat sa Cebu Daily News.

Apan si Rama sa iyang bahin nagkanayon nga wala siya mabalaka ning maong kiha ug adto niya ipahayag sa korte   ang iyang baruganan kalabot sa maong isyu. Daan na siyang misupak sa mando sa korte nga pabayran ang lote sa mga Rallos. (BANAT NEWS)